गर्भवती तथा सुत्केरी आमालाई सिमकोटको कुखुरा कोशेली

समाज

गृहपृष्ठ
समाज
गर्भवती तथा सुत्केरी आमालाई सिमकोटको कुखुरा कोशेली

गर्भवती तथा सुत्केरी आमालाई सिमकोटको कुखुरा कोशेली

बिहीबार, वैशाख १७, २०८३ कचहरी समाचारदाता

सिमकोट । गर्भवती तथा सुत्केरी आमालाई हुम्लाको सिमकोट गाउँपालिकाले एक–एक वटा कुखुरा कोशेली प्रदान गरेको छ ।

सुनौलो हजार दिन कार्यक्रम अन्तर्गत गर्भवती तथा सुत्केरी आमालाई कुखुरा वितरण गरेको हो । पोषण अवस्थामा सुधार ल्याउने उद्देश्यले प्रत्येक आमालाई एक–एक वटा कुखुरा प्रदान गरिएको गाउँपालिकाले जनाएको छ ।

सिमकोट गाउँपालिका पोषण शाखाका संयोजक दिपेन्द्र भण्डारीका अनुसार, आमा तथा शिशुको स्वास्थ्य सुदृढ बनाउन र घरमै पोषणयुक्त खाद्य सामग्रीको उपलब्धता बढाउन यो कार्यक्रम सञ्चालन गरिएको हो । “सुनौलो हजार दिन” अवधिमा उचित पोषणले आमा र बालबालिकाको शारीरिक तथा मानसिक विकासमा महत्वपूर्ण भूमिका खेल्ने भएकाले यस्तो पहल गरिएको हो ।

गाउँपालिकाले पूर्ण पोषणमैन्त्री वडा घोषणा अभियानलाई सफल बनाउन समेत यस कार्यक्रमले सहयोग पुग्ने विश्वास लिएको छ । स्थानीय स्तरमै अण्डा तथा मासुको उत्पादन बढ्दै जाँदा आमाहरूको पोषण अवस्थामा सुधार आउने अपेक्षा गरिएको छ ।

यस कार्यक्रमबाट लक्षित वर्गका आमाहरू प्रत्यक्ष रूपमा लाभान्वित भएका छन् भने समुदायमा पोषण सम्बन्धी जनचेतना अभिवृद्धि हुने अपेक्षा गरिएको छ । सिमकोट गाउँपालिका वडा नम्बर २,३,४ र ५ का सुनौलो हजार दिनका आमालाई वितरण गरेको संयोजक भण्डारीले जानकारी दिए ।

प्रकाशित मिति: बिहीबार, वैशाख १७, २०८३ १६:४३

प्रतिक्रिया दिनुहोस्